Chin Ramkulh Coronavirus Disease-2019 (COVID-19) in kan i runven khawh nakhnga le dohnak (Response) tling deuh in kan tuah khawh nakhnga Chin Ramkulh Cozah nih ni zeimawzat khualtlawng phur motor pawl lutchuak a phihkhar i 2020 June 3 in caantling in a tlungkal than cang hna tiah thawng kan theih.
Hi kong he pehtlai in Chin Ramkulh Kuatphurhnak Zung ah rian ngei upa U Saw Myint Lwin nih, “Chin Ramkulh chung khualtlawng phur motor le eidin a phur mi motor pawl caantling in an chuah khawh than nakhnga biaruahnak tuah a si. Biaruahnak kan tuahnak ah mizapi lungtling in June 3 in khualtlawng motor luhchuah khawh si cang seh tiah biachah a si. Cun, pakhat a um mi cu Ngandamnak Zung nih tuah uh tiin dingrep an chuah mi ning in tlunkalter an si lai,” tiah The Hakha Post ah a chim.
Motor hi a hlan bantuk in caanhmaan in a chuak lai nain a hlan nakin aman tam deuh lai tiah Hakha – Yangon, Hakha-Mandalay a kal mi Hakha Maan Express i rianngeitu sin in kan theih.
Motor man a kai ding kong he pehtlai in Hakha Maan Express i rian a tuanmi pakhat nih, “Kan nih hi Cozah nih a onh lecangka June 3 in khualtlawn kan i thok cang. Asinain aman tu hi cu a hlan nakin a tam deuh. Hakha in Yangon tiang hi Ks. 50,000 in lak a si cang lai. Cun, kannih hi Mandalay ah a kal mi motor a ngan le a fa tiin a um i motor a ngan mi hi Ks. 22,000 le motor a fa mi Ks. 30,000 in kan lak hna lai,” tiah The Hakha Post ah a chim.
Atu bantuk in motor man a hlan nakin tam deuh an lak mi kong he pehtlai in Chin Ramkulh Kuatphurhnak Zung rianngei upa U Saw Myint nih, “Atu bantuk in aman tam deuhnak a ruang bik cu hlan bantuk in thutdan pakhat ah minung pakhat a si ti lai lo. Minung pahnih thutnak ah minung pakhat lawng an thu cang lai. Cucaah motor ngei pawl an sungh nakhnga lo a man kai deuh in kan tuahpiak hna hi a si,” tiah The Hakha Post ah a chimchap.
Hakha in Kalay tiang a kal mi motor Shwe Lwin Pyin hi June 3 in a kal than i minung 13 thutnak ah minung 7 lawng an thu cang. A hmailei thutnak hi Ks.18,000 le a hnulei thutnak hi Ks.15,000 in an lak hna. Cun, Hakha in Kalay tiang a kal ve mi Taungzalatt zong June 8 in a kal than lai i, aman tu cu a hlan ning tein a si lai tiah kan theih.
