COVID-19 ruang ah mizapi kan lungrethei i facang man kai hrimhrim lo ding, a man zong vinyl ah tial dih ding le mizapi hmuh khawhnak hmun, March 27 hlan ah taar ding, nawl a zuul lo mi cu hmanlio mi phung (tae-se upadi) in dantat an si lai, tiah Hakha Peng Sipin Lutlai Pu Tam Aung Shing nih March 26 ah The Hakha Post ah a chim.
“Thil man hi kai hrimhrim hna hlah seh. Mirum nih cun tampi an cawk khawh. Asinain, nifatin hlawhchom in riantuan mi ca ah a si thiam hrimhrim lo mi a si. Cucaah, facang man kai lo ding. Cun, facang min, pi khat ah zeizat tibantuk kha a man he vinyl in mizapi hmuh khawhnak hmun ah an taar hrimhrim lai. An taar lo i a man an kai ahcun hmanlio mi phung in dantat an si lai. Cun, March 27 tiang ah vinyl a taar loin a zuar mi cu dantat an si thiamthiam lai,” tiah Pu Tam Aung Shing nih The Hakha Post ah a chim.
Hi thil man kong hi facang lawng tinak theng a si lem lo. Dawr dangdang zong thil man kai hrimhrim lo ding. An kai ahcun Sipin nih a ngeih mi hmanlio mi phung lawng si loin Penguk Zung lei nih hmanlio mi phung tiang in dantat an si lai, tiah a cunglei upa nih a chim fawn.
