Hakha peng ah COVID-19 zawtnak ngei mi an karh i Hakha sii-inn pi ah an i tlum tilo a si ahcun Taingyin sii-inn ah kan chiah hna lai, tiah Minister Pu Pau Lun Min Thang nih a chim.
Miniter Pu Pau Lun Min Thang nih, “COVID-19 zawtnak hi Hakha peng zong ah a karh thluahmah cang ca ah Hakha sii-inn pi ah an i tlum tilo ahcun Taingyin sii –inn ah chiah ding in timhlamhnak kan ngei. Taingyin sii-inn hi ihkhun 16 tlum a si. Taingyin sii-inn ah hin hman ding ti cu a har pah nain atu hi kan tawlrel cuahmah lio si ko,” tiah The Hakha Post ah a chim.
“COVID-19 zawtnak kong hi mizapi nih kan theih tuk cang nain a vun rauh pah tik ah kan daithlang thluahmah cang. Zawtnak ngei an um ti kan theih lawng ah mah le mah i runven kan hmang. COVID-19 zawtnak a daih hlan cu zei nan tuah poh ah mask i huh le kut tawl hi phlih hlah u. COVID-19 zawtnak tih in zei hmanh tuah loin inn ah um sawh ding a silo, tuah uh, tuan uh, natein Ngandamnak le Zaanglek zung nih an chuah mi zulh phung pawl kha zulh ding zei tik hmanh ah phlih hlah uh,” tiah The Hakh post ah a chimchap.
October 19, 2020 tiang Chin ramkulh chung COVID-19 zawtnak ngei mi minung 60 an si. Damnak a hmu i sii-inn in a chuak mi minung 42 le a thi mi pakhat an si i zawtnak ngei zohkhenh cuahmah mi minung 17 an si, tiah kan theih.
