Hakha Peng Tiphul khuami kum 18 nu cu Myanmar ram Ngandamnak Zung nih April 29 zinglei suimilaam 7:00 ah COVID-19 positive a si, tiah a thanh.
Mizaw a khualtlawnnak le konglam pawl cathanh chuah mi ah, “Tuluk ram in March 20 ah Shan Ramkulh Muse khua a phan. M-2 khualriahbuuk ah a riak. March 21 ah Muse in Mandalay ah Shwemanndalar motor in a kal i March 23 ah Mandalay a phan. March 24 Shwemanndalar motor in aa thawh i Kalaymyo hi March 25 ah a phan. Taungzalatt No. 3 Sang ah a hawinu (min langhter lo mi) te inn ah aa thum. April 6 ah Taungzalaat motor fa mi in Hakha lei ah a tlung. A zaanlei lila ah aa cit mi motor a hlan i Tiphul tiang a va thlah. Tiphul Khuabawi Zung cazi nih (min langhter lo mi) April 16 ah Hakha Penguk U Myint Oo sin ah thawng a thanh. Pengukchang U Tint Wai nih April 16 zaanlei ah Hakha sii-inn-uk Dr. Mang Biak Kung sin ah thawng a thanh i Na.Ta.La. sianginn ah Quarantine an chiah. Na.Ta.La. sianginn ah Quarantine in an chiah mi hna hi pa 8, nu 4, an dihlak ah minung 12 an si,” tiah cathanh chuah mi cu Chin Ramkulh Cozah Chimphuannak Nawlngeitu Sipin le Electric Minister Pu Soe Htet nih The Hakha Post ah a kan pek.
“Amah hi Tuluk ram in a rak tlung mi a si. Amah nih a chimnak ahcun Kalaymyo ah Quarantine an ka chiah bal cang, a ti. Hakha hi April 6 ah a phan. Hakha ahcun caan sau a um rua lo. Tiphul khua tu ahcun caan zeimawzat a um manh rua. An khua in Hakha ah Quarantine in a hung um. Hakha Na.Ta.La. sianginn ah Quarantine kan chiah. A hawile Quarantine chiah mi hna he an thi kan kuat i April 29 zinglei suimilaam 7 ah COVID-19 positive a si, tiah an thanh. Atu hi Hakha sii-inn ah kan thial cang. Mizapi nih lengchuah le a bik in sii-inn lutchuah i ralrin a herh,” tiah Chin Ramkulh Cozah Social Affairs Minister Pu Pau Lun Min Thang nih The Hakha Post ah a chim.
Hakha Na.Ta.La. sianginn ah Quarantine minung 12 an chiah hna. Pakhat cu positive a si i a dang Quarantine chiah mi hna hi nihin tiang an dam ko, tiah kan theih.
