April 29 Hakha ah kum 18 nu COVID-19 mizaw an hmuh mi a rak riahnak Kalay Taungzalatt Sang um chungkhar pahnih cu April 29 thok in tuanvo ngeitu nih lengchuah an phih tiah thawng kan theih.
Luhchuah phih mi inn ngeitu pakhat nih, “Hakha ah zawtnak a ngei mi hi kan nau he aa kom mi a si i kan inn ah a tlung. An khua a phanh hlan ah Cozah nawlngeitu sin ah kan theihter hna i lengchuak lo phungning in aa erh. Aa erh caan a tlin dih tik ah phungning in tuanvo ngeitu nih tlun khawhnak nawl an pek i an khua ah a tlung mi a si. April 29 zing ah a vun kan chawnh i ‘COVID-19 positive na si an ka ti i ka khuaruah a har ko. A ruah awk bak ka hngal lo. Ka dam fawn ko tung,’ tiah a vun kan chawnh,” tiah The Hakha Post ah a chim.
Hi mizaw a tlunnak chungkhar hi minung paruk khuasa an si. An inn compound chung ah chungkhar dang pakhat an um ve ca ah phungning in an chungkhar hnih cu luhchuah khap an si. Hi hna chungkhar hnih zohkhenhnak kong he pehtlai in Taungzalatt Sang Khuabawi nih, “Thawng kan theih lecaangka in tuanvo ngeitu kan va kalcolh. Chungkhar ralrin ding le COVID-19 he pehtlai mi kong zong kan chimh hna. Cun an thi cheknak zong tawlrelcolh a si. A si khawh chung in runvennak tuanvo kan laakcolh. Daithlanh kan tim hna lo. Kan Sang chung zong ah hmun nga ah duty zong kan chiah cang,” tiah The Hakha Post ah a chim.
Hi chungkhar hnih hna cu nihin tiang ah cun an dam. Hmailei an dirhmun kong he pehtlai in chungkhar an pa nih, “Pathian nawl a si ko. Thla tu kan campiak cio ko u,” tiah media ah a chim. Hakha ah an hmuh mi mizaw hi Tuluk ram in Myanmar ram ah a rak tlung mi a si. A tlunpah March 25 ah Kalaymyo a rak phan. April 6 ah Hakha in Tiphul khua a phan. April 16 ah Hakha ah Quarantine in a um. April 29 ah zawtnak a ngei tiin Ramkomh Ngandamnak Zung nih zinglei 7:00 ah a thanh i Hakha sii-inn ah an thial, tiah kan theih.
Photo/ Internet
