Chin Ramkulh Cozah nih Myanmar ram kum thar ni April 17 ah Hakha um tar pawl upat peknak le conglawmhnak cu Chin Ramkulh Cozah Zung ah an tuah.
Hakha khuachung ah Putar Pitar kum 85 cung a um mi hi 118 an si. Putar 55 le Pitar 63 an si. Hi upat peknak ah a chuak kho mi hi minung 60 tluk lawng an si. Chin Ramkulh Chief Minister le Chin Ramkulh Hluttaw Chairman tel in Minister dangdang zong nih an telpi hna.
“Hi upat peknak ah tar pawl cu laksawng peknak zong kan ngei. Hakha ah tar kan i ngeihchun hi an tam ti lo. Hi kan ngeihchun mi hna hi kan dawt hrimhrim hna a hau. Hakha ah buaktlak in minung 30000 kan um i atu tar kum 85 hi zohchih ahcun minung 250 ah pakhat lawng hi kum 85 leng kan nung tinak a si,” tiah Chin Ramkulh Sipin Lutlai Pu Thla Hre nih The Hakha Post ah a chim.
Hi upat peknak ah tangka in laksawng an pek hna i a hmun a phan kho lo mi zong an umnak cio ah pek an timh hna.
Hi kong ah Chin Ramkulh Cozah nih Sangkip Khuabawi fial in cazin an laakter hna i cazin an laak mi ah hrelh mi cheukhat an um tiah mi cheukhat nih an chim ve.
