Social Media pakhat nih 2020 July 19 ah thawngpang pakhat a tial mi ah, “CNF/A nih AA hriamtlai doh an duh ahcun hriamnam siseh, a herh mi tangka tiang in ka bawmh hna lai,” tiah an tial mi cu CNF upa Dr. Sui Khar nih, “Kanmah hmanh nih kan thei lo,” tiah The Hakha Post ah a chim.
An tial ning ah, July 19 Martyrs’ Day ah Senior General Min Aung Hlaing cu media pakhat nih bia a hal i atu bantuk in a chimnak kong kha an langhter. CNF/A nih AA hriamtlai Paletwa in chuah ding nawl a chuah mi kong ah an hal i a lehnak a si, tiah an langhter. Gen. Min Aung Hlaing nih, Cozah ralkap lei in CNF/A kong ah chim ding a um lonak, bochan mi an sinak, AA doh an duh ahcun full support ti mi a herh mi tangka siseh, hriamnam tiang ka bawmh lai, tiah a chim mi an langhter.
“Zeihmanh kan thei lo. Gen. Min Aung Hlaing hi July 19 ah bia a chim maw chim lo zong kan hngal lo. A tawinak cun, hi thawng hi zeihmanh kan thei lo,” tiah Dr. Sui Khar nih The Hakha Post ah a chim.
Chinmi hi Social Media ah kan thangcho ngai i media 100 lengkai kan dirh cang. Thawngpang diklo aupi in tangka kawlnak tiang a hmang mi an um bantuk in CNF/A thawngpang a leng mi zong a fiang thiamthiam lo, tiah kan theih.
