Ruahsur ruang ah a rawk mi Gangaw-Rezua motor lampi cu tlamtling te in remh a si cang caah nihin May 31 thawk in ahlan ning in thilphortu motor pawl an kal kho cang, tiah theih a si.
Ruah a tam caah Rezua le Gangaw karlak motor lampi cu May 24 thawk khan meng 46 zawn ah a rak rawk i, thilphortu motor tam nawn a rak hren hna.
Zotung Federal Council, lamsul lei department nih lam a rawhnak zawn cu khulrang in an hun remh i nihin ah motor a hun kal khawh hi a si.
Gangaw-Rezua lampi hi Fur, Thaal le Khuasik zong ah kal khawh peng ding in Zotung hmunram mizapi ukhruaitu bu le Chinland Cozah i bawm in an remh cuahmah lio zong a si.
Hi Gangaw-Rezua motor lampi hi Matupi, Lautu hmunram, Mara hmunram, Senthang hmunram le Zophei tlang hna nih abiapi in an hmanmi a si, tiah kan theih.
