Gangaw-Hakha lampi cu a rauh hlan ah hon ṭhan colh a si lai, tiah Yaw Defense Force (YDF) ṭuanvo ngeitu nih a chim.
CNA nih YDF ralkap pahnih aruang um lo in an tlaih ti mi ruang ah July 8 thawk khan Gangaw-Hakha lam cu YDF nih an phih i, Laitlang lei a kai ding mi mawtaw 70 hrawng zong an i hreng.
YDF ṭuanvo ngeitu Ko Myat Thu nih, “Kanmah lei nih zeihmanh theihnak um lo in YDF ralkap pahnih CNA nih an tlaih hna. CNA Commander-in-Chief nih cun July 10 ah kan thlah hna lai a kan ti. Asinain, a relrem rih lo caah kan thlah rih hna lo, thaizing ah kan thlah hna lai tiah nihin ah a kan ti. Lam tu cu a ruah hlan ah kan on ding in timhtuah a si ko,” tiah a chim.
Magwe ramṭhen, Gangaw peng ah hram a bunh i, AA le Chin Brotherhood he ral a do mi YDF ralkap pahnih Ko Ok Thein le Ko Aung Thet Khine cu July 7 ah khan Matupi peng, Zawngnak khua ah CNA nih an tlaih hna.
Hi kong he pehtlai hin CNF/CNA chimnak nawlngei Salai Htet Ni nih, “Bia hal awk kan ngeih hna caah kan kalpi chungmi hna a si. An hruaitu hna he biaruahnak kan ngei ta lai i a tlamtling ko lai,” tiah media sin ah a chim.
