A voi 70nak Chin Miphun Ni cu Gangaw khua zong ah tuah timh a si nain Gangaw Pengkomh-uk nih biachimtu ding an sawm mi CNF/A in Col. Solomon Thang Ding biachimnak nawl a pek lo ca ah Chin Miphun Ni tuah thai loin an ngol, tiah kan theih.
“Chin Miphun Ni kong Tawlreltu hna nih an ka sawm i ka va kal. Pengkomh-uk (Khayaing-hmu) nih biachimnak pe hlah u, a ti ca ah Tawlreltu pawl zong an thinhung i an ngol. Kan tuah ti lai lo, an ti fawn i ka lung a tha lo tuk,” tiah biachimtu ding ah khuallian in sawm mi CNF/A in Col. Solomon Thang Ding nih The Hakha Post ah a chim.
Chin Miphun Ni Tawlreltu pawl nih hlasak, laam le a phunphun an cawng cang nain biachimtu ding ah sawm ve mi Gangaw Pengkomh-uk nih Col. Solomon biachim ding a duhlo ca ah atu bantuk in puai zong an leet thainak hi a si, tiah kan theih.
“Gangaw ah hin Chinmi hi Kawlmi le miphundang he an i cawh tuk tik ah miphundang nih an rak neek hna ca ah Chinmi ka si, aa ti ngam lo mi hi an tam ngai. Chim duh mi cu Chin Miphun Ni hi kan i funtomnak a si bantuk in tutan ah an leet mi hi a poi taktak tiah ka ruah. Keimah biachim khawh lo ruang ah leet hlah u, tuahchih ko u ka ti hna nain an duh bak lo,” tiah Col. Solomon nih a chimchap. (By: Salai KB Laikhal)
