Fuur caan lam a rawh tawnnak hmun ah lam cawhnak seh chiahpiak a si lai

Chin Ramkulh chung khual lampi kip ah fuur caan i lam a rawh tawnnak hmun kip ah Chin Ramkulh Lamsul Zung nih lam cawhnak seh chiah an timh tiah May 15 ah thawng kan theih.
“Chin Ramkulh in khualeng chuahnak lampi pawl ah seh ngan mi hi chiah dih kan timh. Chin Ramkulh cu kum fatin in ruahti a tam ca ah ralrin ah chiah kan timh mi a si. Lamsul lei zong a si khawh chung le budget a um chung in remh le cawh a si ko nain ruahti nih a hrawh tawn ca ah ralrin kan hau. Cun motor ngan pawl zong zaantim ti bantuk ah khual tlawn an hmang i hihi tih a nung tuk mi a si. Zaan ah cun lam a that lonak zong an hmu kho ti lo i fuur caan ahcun zaan ah khual an tlawn hi ka duhpaik hna lo,” tiah Chin Ramkulh Lamsul lei Minister Pu Sui Thio nih The Hakha Post ah a chim.
Chin Ramkulh Lamsul lei Zung nih thlaruk budget ah Taungkhanran lam, Sami le Paletwa kar lam le Saisih chuak lam biapi in tuanchuah an timh rih.