USA ah tuah mi Fury Fighting Championship ah, Hakha Peng Ruan khuami Salai Joshua Van Bawi Thawng nih teinak a hmuh tiah theih a si.
Joshua Van Bawi Thawng he aa thua mi pa hi Luke Guillen timi pa a si. Cun, atu amah he aa thawng mi Luke Guillen hi a hlan ah Wrestling ah aa thong bal cang mi a si. Joshua hi a pa Pu Uk Tu (Ruan) le a nu Pi Ca Zi (Hniarlawn) an si.
Hi kong he pehtlai in Joshua Van Bawi Thawng nih, “A voi khatnak kaa thuat ah teinak ka hmuh tik ah kaa lawm taktak. Atu kan i thuatnak hi teinak hmuh man laksawng ti bantuk pawl cu a um lo nain, hmailei ca ah ruahchannak tampi a um. Ka miphun hawi zong nih ka hnulei nan ka dirpi cia bantuk in hmailei caan zong ah atu nakin ka dirpi in ka tanpi hram rih ko uh, keimah zong ka si khawh tawk in kaa zuam ve lei,” tiah The Hakha Post ah a chim.
Fury Fighting Championship hi Mixed Martial Art (MMA) a si. MMA ahhin kanmah Chinmi chung in Tial Cung Thang le atu Joshua hna hi an si. Atutan aa thuatnak ah Joshua nih Luke cu round 1nak, minute pakhat le cheu ah a tei.
