Myanmar ram ralkap nih February 1 in Myanmar ram nawl ngeihnak a laak caah mizapi an thin a phang i Hakha khua ah facang cawk an i cuh.
“Kannih hi ni dang nakin kan manh deuh ngaingai. Nihin chung zaanlei suimilaam 2:00 tiang ahhin facang tun 50 tluk kan manh cang. Inn khat nihhin tun hnih in tun nga tiang hrawng cu an i cawk cia hna. A tam bik a la mi cu tun 10 a si,” tiah Dawrthar sang ah facang dawr a tuah mi Van Bawi Hu nu nih the Hakha Post ah a chim.
Cun facang dawr ngei pakhat a si ve mi A Nawn nih hitin The Hakha Post ah a chim ve. “Tuni thilcang ruang ah mizapi kan lau cio ko rua. Cucaah a si lai, kan manh deuh ngaingai. Kannih dawr hi tutiang ah facang tun 70 hrawng cu ka manh cang,” tiah The Hakha Post ah a chim ve.
James Store facang dawr ngeitu Elma nih “Nihin hi thla dihka zong cu a si ve ca ah kan manh deuhnak zong cu a si ko lai. Cun tu ni hi cu mizapi kan lau pah ko rua. Kan facang hi kan manh deuh ngaingai. Atu tiang ahhin tun 150 in tun 200 kar hi kan zuar manh cang,” tiah The Hakha Post ah a chim ve.
2021, February 1 ah Myanmar ram ramkhel buaibainak a chuah ca ah mizapi thinphang thlalau in um cio a si i, din le ei i zalh cio a si. Cucaah facang dawr ah kal in The Hakha Post nih facang zuartu hna sin biahalnak kan va ngeih hna. Biahalnak kan va tuah hna hi zanlei suimilaam 2:00 tluk ah a si i, cu tiang ah hi zat an manh hna tiah kan theih.
