Falam khua surbung tlang ah tuah cuahmah mi vanlawng bual cu zatuak 100 chung ah zatuak 30 lim a si cang, tiah Chin Ramkulh Lamsuul lei Minister Zung in April 10 ah thawng kan theih.
“Hi surbung tlang vanlawng bual tuahnak ca ah budget 25 billion tluk a dih lai tiah suaisam a si i hi chung ah 10 billion hrawng hman a si cang i vanlawngbual cu zatuak 30 lim a si cang. A tuantu nih pehzulh in an tuah cuahmah ko,” tiah Chin Ramkulh Lamsuul lei Minister Pu Sui Thio nih The Hakha Post ah a chim.
Surbung vanlawng bual cu NLD Cozah nih Cozah a tlaih chung kum nga chung (2020 kum) ah lim ding in timh a si. Hakha le Thantlang zong nih vanlawng bual tuah ding an timhlamh lio le a hmun an zoh lio a si ve.
“Chin Ramkulh Cozah dirhmun in cun surbung vanlawng bual hi lim hmasa hnu lawng ah a dang hi pehzulh ding a si. Hakha le Thantlang nih vanlawng bual tuah an timh mi hi kan kham hna lo. Falam a dih in cun pehzulh in tuan ding mi thiam a si ko. Cu belte cu company pakhat khat nih bawmh in tuahpiak ding a si ahcun an tuahpiak khawh ko hna. Caan saupi a rau rih ding a si ko mi hmun dang ah atu in vanlawng bual tuah ding kan timh, a hmun hna kan zoh mi hi Myanmar ram Cozah record ah um seh ti kan duh. NLD nih Cozah a tlaih ti lo zong ah Cozah dang a kai mi nih pehzulh in tuan hna seh ti kan duh ca ah a si,” tiah Pu Sui Thio nih a chimchap.
Hi bantuk in Paletwa le Lailenpi zong ah vanlawng a fa mi tumnak tuah khawh ding zong timhlamh a si i a caan a phak tik ah pehzulh in tuan ding in timh a si, tiah Chin Ramkulh Lamsuul lei Zung in thawng kan theih.
Photo: Internet
