Chin Ramkulh, Falam Peng ah tuah mi Surbung Airport ah hneksaknak ca ah ATR-72 minung 70 tlum vanlawng cu tluang tein 2020 October 27 suimilaam 10:28 ah a tum kho tiah theih a si.
Hneksaknak ca ah a tum mi vanlawng hi Yangon International Airport in a rak ra mi a si i, Yangon in Mandalay, Mandalay in Surbung ah a tum hi a si, tiah kan theih.
Surbung Airport ah vanlawng a tum mi kong he pehtlai in vanlawng mawngtu Captain Pu Khup Khan Mung nih, “Surbung Airport hi Myanmar ram chung ah rili in a san cemnak hmun ah a ummi a si. Vanlawng kan mawngh tik zong ah harnak a um lo. Seh thilri an bunh mi pawl zong hi a tha tuk ko. Asinain, nikhua caan nih a neih lai. Atu a voi khatnak kan rat hna hi cu nikhua zong nih a pek tuk. Hmundang kan kalnak pawl he aa dannak a um lo. Chin Ramkulh chung ah atu bantuk in vanlawng a tum ve cang i keimah pumpak zong in kaa lawm taktak. Yangon in Direct kan kal a si cun suimilaam 2 fai kan rau lai,” tiah The Hakha Post ah a chim.
Surbung Airport hi 2015-16 in Cozah nih Pyidaungsu Budget 37 Billio dih in tuan hram an rak thok i, nihin ahcun an lim dih cang. Hneksaknak an tuah ni ah Vice President-2 Pu Henry Van Thio le a chungkhar, Chin Ramkulh Chief Minister Salai Lian Luai le Cozah Lutlai dangdang zong an i tel.
Cun, CM Salai Lian Luai nih, “Nihin vanlawng hneksaknak tuahnak hmun ah tlamtling tein vanlawng a ngan mi a tum khawh tik ah kan i lawm tuk. Atu cu vanlawng tlamtling in a tum khawh cang ca ah mizaw zualkai ca ah tampi a kan thathnempi lai. Cun, fimcawnnak lei zong ah kan fale sianginn kai tlunkal caan zong ah tampi a bawmh khawh cang hna lai. Ramleeng lei minung zong nih Chin Ramkulh ah fawizaang tein an ra kho cang lai. Hi vanlawng bual hi tampi kan i thathnempi hrimhrim lai,” tiah The Hakha Post ah a chim.
Surbung Airport hi Myanmar ram chung Airport 96 chung ah rili in a san cemnak hmun ah a ummi zong a si. Surbung Airport hi Chin Ramkulh chung ah a pahnihnak ah tuah mi a si. A pakhatnak hi 1978 kum Paletwa ah an rak tuah i, vanlawng a fa mi zong a rak tum bal cang tiah theih a si.
