Falam (Surbung) vanlawng tualrawn atu ah riantuan lim a si rih lo ca ah a tang rih mi riantuan ding pawl cu a zapi lim dih ding in Myanmar ram President nih rian ngeitu hna sin ah a fial hna tiah kan theih.
Falam (Surbung) Vanlawng tualrawn hi a liam cia June 25-27 tiang seh thilri an bunh mi vanlawng he aa pehtlaih ning a tha maw tha lo ti mi Flight Check an tuah. Hi zohfelnak an tuahnak ah seh thilri an bunh mi pawl cu aa pehtlaih ning a tha ko nain tlang pakhat an chimh lomi a um ca ah Pilot pawl nih an tih tiah theih a si.
Hi kong he pehtlai in rian ngei upa Pu Ngun Thawng nih, “Surbung vanlawng tualrawn kong ah President zong a um kho ti lo. Amah hrimhrim nih a dihlak in limter ding in an kan ti. Cun, rian a tuantu pawl zong tuan ding a tang mi a dihlak an tuan hlan lo an seh thilri pawl kirter lo ding in a nawl cang hna. Tuan ding a taang mi hi cu tlang an vih mi a tlamtlin lo ca ah hi tlang hi a dihlak rawn dih ding chimh ding hi a si. Tlang chimh ding mi hi kehlei le ohrlei in a um. Cucu an chimh ta dih lai. Amah President awka hrimhrim in fial mi lawng si loin a facebook cahmai tiang ah a langhter,” tiah The Hakha Post ah a chim.
Falam (Surbung) vanlawng tualrawn hi pe 6000 sau, pe 100 kau a si i, France ram le Italy ram ah a kal mi ATR-72 vanlawng phun a tum lai. Atu ah zatuak in 97 an lim cang tiah kan theih.
Photo/ The Hakha Post
