Falam khuapi sangthar samhnak project i a hmasa bik innhmun 247 an pekmi hna ah ram a ngeitu Sunthla le C. Zamual ca ah inn hmuin 10 lawng pek an si i, hi innhmun a cotu hna nih Bank ah tangka sing 10 pek a hauh caah cheukhat cu harnak an tong tiah thawng kan theih.
2020 November 22 ah Sunthla khua i ram ngeitu dirhmun in innhmun 10 a comi hna cu camcawhfung zuhter i dikfel in mizapi sin ah phawtzamhnak an tuah. Innhmun a cotu cheukhat hna cu tangka sing 10 tiang pek ding a si ca ah harnak an tong i lungrethei in a umi an um.
“Ram a ngeitu hna ca ah innhmun 10 kan in pek hna tiah Cozah lei nih an kan ti ko nain, innhmun pakhat ah sing 10 an hauh tik ah khuaruahhar ngai a si ko. Cun, tangka sing 10 zong hi November thla chung ah pek dih ding in an kan ti ca ah innhmun a cotu cheukhat cu lungrethei in an um,” tiah Salai Ngepi nih The Hakha Post ah a chim.
Falam sangthar samhmi innhmun 247 cu camcawhfung zuhter in a cotu hna sin ah theihthernak ca zong an kuat cang.
Hi ca an kuat mi hna chung ah, a hnu bik tangka pek ding hi November 30 ah a rak si. November 27 in 30 tiang zungkhar a si ca ah November 26 hi a hnu bik chia in tangka nan pek dih lai tiah an ti than hna.
