Falam peng, Tibual SAC ralkap camp cu nihin November 15, zinglei suimilaam 5: 00 fai hrawng ah CNDF nih an laak khawh cang tiah kan theih.
Tibual camp cu zahan zaan suimilaam 11:00 hrawng in CNDF nih kah hram an thawk i tu zing ah an laak khawh. SAC ralkap a zaam mi zong an um i camp cu CNDF ralkap nih mei in an khangh tiah CNDF tuanvo ngeitu pakhat chim mi cherhchan in The Rihli Voice nih a tial.
Tibual kahdohnak in a zaam mi SAC ralhraang pawl cu Mizoram ramri an phan i Vaphai ah a um mi India ralkap Assam Rifles nih chanhchuah ding in an i tim ti zong an tial.
Tibual SAC camp kahdohnak ah CNDF lei hma pu le a thi mi an um lo tiah theih a si.
CNDF nih April 10 lio zong ah Falam peng, Falam-Kalay lam cung ah a um mi Vaar SAC camp zong an rak laak cang.
November 13 ah CNA hruainak in CNA, CDF-Hualngoram, CDF-Zaniatram, CDF-Thantlang Drone Team le PDA nih Rihkhawdar SAC Camp le Tio SAC Camp zong an laak khawh i Rihkhawdar khuapi ning in an laak khawh.
