Myanmar ram party tling Democracy thimnak ah Falam Peng Ramkulh Hluttaw No.2 ah,National League for Democracy (NLD) in aa zuam ding, atu lio Chin Ramkulh Chief Minister Pu Salai Lian Luai le Chin National League for Democracy (CNLD) in 2010-2015 Sagaing Ramthen, Chin Affairs Minister a tuan mi Pu No Than Kap hna hi zatuak 50% hrawng cu teinak an hmuh veve ko lai ti ka zumh tiah Minister Pu Soe Htet nih a chim.
“Pu Salai Lian Luai hi Cozah lei hruainak lei ah hmuhton mi (Experience) a ngei mi a si. Mizapi nih kan theih cio bantuk in Chin Ramkulh Cozah Chief Minister a tuan lio mi bak a si. Cozah Lutlai a tlaih chung, Falam Peng ca ah a tuan mi hi a tam taktak. Mizapi nih i ruah ngam lomi pakhat a tuah mi cu Falam Surbung Airport pi khi a si. A dangdang zong a tuan mi tampi a um. Hihi mizapi nih an philh hrimhrim lai lo ti ka zumh. Atu amah he aa zuam ding zong hi mizapi nih theih mi a si tik ah Pu Salai Lian Luai nih tlangcimh vawlei cimh in a tei lai ti cu ka zum lo. Asinain Zatuak 50% hi cu a hmuh ko lai ti zumhnak ka ngei,” tiah Minister Pu Soe Htet nih The Hakha Post ah a chim.
Falam Peng, Ramkulh Hluttaw No.2 hmun ah aa zuam ding hna hi United Democratic Party (UDP) in Pu Bual Uk, NLD in Pu Salai Lian Luai le CNLD in Pu No Than Kap hna an si.
Cun, Pu No Than Kap kong he pehtlai in, Minister Pu Soe Htet nih, “Pu No Than Kap zong hi a hlan lio ah CNF/A hruaitu a rak tuan lawng si loin Sagaing Ramthen, Chin Affairs Minister zong a rak tuan bal. Cun, atu ah a dirpi ding zong hi an um ve hrim ko lai ti ka zumh. Pu Salai Lian Luai he aa zuam ding an si tik ah mizapi zong nih a phichuak hi an i hngahlang cio mi a si lai ti ka zumh. Amah lei zong siseh, Pu Salai Lian Luai zong nih siseh zaa ah zaa cu an i tei veve lai lo ti ka zumh. Zatuak 50% veve cu an si theu te lai ti ka zumh,” tiah The Hakha Post ah a chim.
2020 kum Myanmar ram party tling Democracy thimnak ah Chin Ramkulh chung in mee a thla kho ding a voi khatnak tiang cazin an taarnak ah minung 331,698 an si tiah Chin Ramkulh, Thimnak Zung in thawng kan theih.
