Falam Peng, Lailun duum ah a um mi ti lionak , 2020 June 26 suimilaam 12:00PM tluk ah tlangval pakhat ti ah a paam, tiah thawng kan theih.
Lailun ti lionak hi an limnak a sau rih lo. Cun, hmannak nawl zong an pe rih lo. Ti ah a paam mi hi Falam khuapi, Balai sang ah a ummi Salai Ngun Thawng Mang (kum 19) a si tiah kan theih.
Chin Baptist Convention in Rev. Dr. T Joshua nih, “Tlangval pathum an si i, an pathum ning in zu rit dawh an si. A thi mi pate hi kum 19 upa a si i, nihin 2020 June 27 suimilaam 10:00AM ah a ruak kan vui. Ti an i lionak hi a nawi pah rih. Cun a thuh lei zong hi pe 3 in pe 5 kar a si,” tiah The Hakha Post ah a chim.
Cun, Lailun duum hngak minung pakhat nih, “Ti lionak kan tuah mi hi honnak kan tuah rih lo ca ah hman khawhnak nawl kan pe rih hna lo. Kei hi ka nu a dam lo ca ah Falam sii-inn ah ka nu ka umpi. Ti lionak hmun pawng ah riantuan mi an um ko nain annih hi chuncaw an ei lio a si i an thei lo i a si lai. Ngakchia nih an thlauh len ko hna nain zei ah an relpiak hna lo. Ti chung a tlak lecangka in riantuan pawl cu an va auh hna nain a hmun an phak ah a nunnak a rak liam cang,” tiah The Hakha Post ah a chim.
Lailun ti lionak hi a sau lei pe 50, a kauh lei pe 30 a kau i pe 3 in pe 5 kar a thuk. Lailun Duum hi Falam in meng 6 a hlatnak hmun ah a um mi a si. Cun, ngakchia ti lionak zong hmun dang tein tuah than an timh tiah thawng kan theih.
