COVID-19 kong he pehtlai in khuami hna chawlehthalnak a tlak nakhnga lo tiin Cozah nih Falam Peng, khuate 15 sin ah Cash for Work le Village Revolving Fund Project simanking an tuah cuahmah tiah Falam Khuate Thanchonak Riantuantu Zung in thawng kan theih.
“Rampi chung i COVID-19 ruang ah chawlehthalnak a tla mi pawl dirpinak a si. Hi simanking hi phun hnih in kan then. Pakhat cu khuate le sangkip ah thanchonak rian an tuan i tuanman pek le chungkhar ah tangka lut a ummi Cash for Work timi a si. Cun pakhat hi VRFP tiah auh mi khuate thanchonak ca ah tangka pek a si. Hi hna hi cinthlaknak lei ca ah siseh, zuatkhalh nak lei ca ah siseh, chungkhar kip sin ah nifatin tangka lut a um nakhnga, pek le bawmh an si,” tiah Falam Khuate Thachonak Zung Lutlai Pi Cing Siam Hnem nih The Hakha Post ah a chim.
Hi tangka an pek ning hna hi khua pakhat ah inn 100 cung a ummi khua poh sing 300 le inn 100 in, inn 50 kar hi sing 200 an pek hna tiah thawng kan theih.
Hi kong he pehtlai in Pi Cing Siam Hnem nih, “COVID-19 ruang ah khuami hna harnak an tong ngaingai kan hmuh. Cun, hi zawtnak ruang ah khualeng zong chuak ngam lo le khuachung ah mikhiual zong luhter loin an um hna ca ah chungkhar ah eidin lei siseh, hnipuan fenhaih lei ah siseh harnak ton cio a si. Khua pakhat ah inn 100 in a cunglei poh hi sing 300, inn 50 in inn 100 kar hi sing 200 le inn 50 hi sing 100 pek an si. Hi tangka pek mi hi anmah lei nih caw zuatnak, sia zuatnak le dumhau tuahnak ah an hman lai,” tiah The Hakha Post ah a chimchap.
Hi khua 15 an pek mi chung ah khuate khua 10 sin ah Cash For Work timi le khuate khua 5 sin ah Village Revolving Fund Project timi an pek hna tiah thawng kan theih.
Photo/ Taungzalat time
