April 5, 2023
Kalay in Hakha lei a kai cuahmah mi SAC ralhrang hna cu Chin ralkap bu komh nih Falam le Hakha kar ah biatak tein an kah hna i SAC ralhrang minung 30 fai an thi cang tiah kan theih.
Atu Hakha lei panh in a kal cuahmah mi SAC ralhrang hna hi minung thazaang in 200 hrawng an si i hi chung ah Chin ralkap bu hna nih a tlawm bik 30 fai cu an thah cang hna tiah raltuknak thawnghram sin in kan theih.
Atu tan kahdohnak kong ah raalhmai suang ah a ummi Chin ralkap pakhat nih, “Kalay in Falam kar tiang hi cu cutipi cun kahnak a faak tuk lo. Falam an hun lonh in kahdohnak a hun faak ngai. An thih tam cemnak hi Falam le Tlangzar kar ah a si. Hi kar ahhin kahdohnak zong nifatin in a um i kahdohnak kip ah pakhat hnih cu kan thah khawh lengmang ve hna,” tiah THP ah a chim.
Falam le Tlangzar kar kahdohnak a fah peng ca ah Falam Peng, Tlangzar khua cu SAC ralhraang nih inn 7 an khangh than tiah theih a si.
SAC ralkap nih inn an khanghnak kong he pehtlai in khuami pakhat nih, “Tlangzar hi a voi thumnak an kan khangh a si. Voi khatnak ah inn 17 an khangh i voi hnihnak ah inn 4, atu tan ah inn 7 an khangh. Thilri chiahnak thlam he telh ahcun inn 8 an khangh. Inn 28 an kan khanghpiak cang. Kannih hi cu lamka ah a um mi kan si caah kan zaam ka in kan inn hi cu a kaang cia in a zaam mi kan si, timi lungput kan ngei cia. Chin ralkap bu himdam hram ko hna seh,” tiah THP ah a chim.
2023 April 5 Tlangzar khua pawng kahdohnak ah SAC ralkap pawl cu hmai fong ngam ti lo in an um caah vanlei raltuknak an cah i minutes 15 chung hrawng MI35 helicopter in Chin ralkap an kah hna. Bomb voi 12 hrawng a thlak tiah kan theih.
“Mizapi nih nan kan dirkamh peng ding le fakpi in thlacam nan kan bawmh peng ding zong kan duh ko,” ti zong Chin ralkap nih an chim.
Tutan kahdohnak ah Chin ralkap bu CNA, CDF-Thantlang, CDF-Hakha le CNDF lei in hliamtuar le nunnak liam an um hraw rih lo tiah theih a si.
