Chin Ramkulh, Falam khuapi sangthar samhmi si-man-king chung ah innhmun 1000 leeng cu a ra lai ding February thla chung ah an samh than lai tiah Chin Ramkulh Cozah chimphuannak nawlngei tu Sipin Minister Pu Soe Htet sin in thawng kan theih.
Falam sangthar samh ciami innhmun 245 cu 2020 November 2 ah Cozah nih a man a khiah mi ning in Falam Penguk Zung ah camcawh fung zuhter in an pek hna tiah theih a si.
Hi kong he pehtlai in Minister Pu Soe Htet nih, “Falam khuapi chung ah innhmun 1000 leeng samh than ding in suaisamnak kan ngei. Asinain, Falam sangthar samh mi ah a cheu cu kan i lim rih lomi zong a um. Sangthar samh mi chung i hmun kan pek mi hna kong he pehtlai in hnarcheu lawng hi rian kan lim khawh rih. Cun, khuami cheukhat hna nih lungtling loin a duh lomi zong an um. Atu samh kan timh than mi zong hi 2021 February thla chung ah a dihlak lim khawh ding in timhlamhnak kan ngei,” tiah The Hakha Post ah a chim.
Falam sangthar samh mi hi a liamcia kum thum lio in an rak tuah mi le an rak tawlrel cang mi a si i, atu ah innhmun 245 lawg innhmun pek an si rih. Innhmun 245 lawng pek an si rih ca ah atu hi innhmun 1000 leeng pek than ding in timhlamhnak an ngeih a si.
Cun, “Khuapi lei ah i thialkam ding hi khuate lei minung tampi zong nih an lung ah a um ngai cang. Khuapi ah a rak i thial mi zong hi an thahnem ngai ngai cang. Falam Peng chung ah minung a ummi hi thong 50 leeng an si. Hi thong 50 leeng chung ah khuapi i a ummi hna hi zatuak in 33% tluk an si,” tiah Minister Pu Soe Htet nih a chimchap.
Chin Ramkulh chung sangthar samh ding kong hi Falam, Hakha le Paletwa lei ah Cozah nih biatak tein rian an tuan cuahmah.
