Chin ramkulh Falam khuapi chung ah 2021 thok in COVID-19 zawtnak khuami chung in ichawnhbarhnak a van karh deuh ngai caah Falam khua chung ummi dawr chung ah thut in ei khawh a si ti lo, tiah theih a si.
Falam khuapi chung ummi dawr ah thut in ei khawh a si ti lonak kong he pehtlai in Falam COVID-19 committee hruaitu Saya Timmy nih hitin The Hakha Post ah a chim.
“2021 thok in Falam khua chung um mizapi sin ah COVID-19 zawtnak ichawnhbarhnak a van karh deuh ngaingai caah January 19 thok in Falam khua chung ummi rawl dawr, zu dawr, le lakphakti dawr hna cu a chung ah thu in din le ei a ngah ti lai lo tiah nawl kan chuah. A ruang cu COVID-19 zawtnak ichawnhbarhnak a zor deuh khawhnak hnga caah mibu in umto hna hlah seh ti kan duh caah a si ko,” tiah a chim.
Falam khua chung ummi rawl dawr, zu dawr le lakphak dawr hna hi 2020 December thla khan dawr chung ah thu in din le ei khawh a si tiah dawr hun khawhnak nawl rak pek an si tiah kan theih.
Falam COVID-19 committee lutlai pakhat simi Saya Timmy nih “Dawr chung thut in din le ei cu January 19 thok in kan phihkhar than cang. Nain parcel in zuar bel cu ka sianh ko hna. Parcel in an zuar ko hmanh ah riantuantu hna nih mask i huh hrimhrim ding ti bantuk COVID-19 phung cu zulh ding in kan cah thiamthiam ko hna,” tiah The Hakha Post ah Saya Timmy nih a chimchap.
January 19 tiang ahhin Falam sii-inn ah COVID-19 zawtnak ngei hi January 19 ah COVID-19 zawtnak ngei an hmuh chap mi pakhat telh in minung 11 an um cang tiah theih a si.
