Chin Ramkulh, Falam khuapi chung luh a duh mi le kal aa tim mi poh nih khua luhnak hauka ah COVID-19 zawtnak i chek i negative a piah lawng ah khuachung ah luhter an si cang lai tiah Falam COVID-19 Response Committee nih cathanh a chuah.
Cathanh an chuah mi kong he pehtlai in Falam Penguk Zung Lutlai Pu Ca Awi nih, “Sagaing Ramthen, Kalay khuapi in Hakha, Thantlang tiang a kal ding poh Falam khua luhnak hauka in zawtnak chek ding in cung lei nih nawl an chuah. Nawl an chuahnak a ruang zong hi Hakha khua luhnak hauka ah zawtnak chek ta loin a lut mi an um tawn ca ah an ti. Zawtnak chek man zong hi minung pakhat ah Ks. 10,000 laak ding a si. Cun, Kalay ah zawtnak aa chek i negative a piahnak ca aa ken zong ah Falam ah voi khat chek than an si thiamthiam lai,” tiah The Hakha Post ah a chim.
Atu bantuk in Falam khua luhnak hauka ah zawtnak i chek hnu lawng ah khuachung luhnak nawl an pek mi hna cathanh an chuah mi cung ah mi cheukhat nih an soiselnak zong a um. Test Kids in zawtnak chek i suimilaam cheu chung hrawng a rau tiah rian ngeitu sin in theih a si.
Cun, Falam COVID-19 kong ah volunteers a tuan mi Saya Timmy Htunt nih, “Falam Peng chung mi hna cu lungtlin pinak ca i ken ahcun luhchuah khawh a si ko. Asinain, peng dang Kalay, Yangon le Tedim lei in a ra mi poh hi cu zawtnak an i chek ta hrimhrim a hau. Atu Falam sii-inn ah zohkhenh mi mizaw zong hi a tam deuh cu Tedim, Kalay le Yangon in a rak tlung mi an si. Peng dang in a ra mi hna hi cu an umnak peng ah zawtnak an i chek i negative a piah mi ca an i ken a hau. Falam ah voi khat kan chek than hna lai i, negative an piah than a si ahcun, Home Quarantine ni 7 chung chiah an si lai,” tiah The Hakha Post ah a chim.
Falam sii-inn pi ah COVID-19 zawtnak in zohkhenh mi mizaw hi an dihlak ah minung 10 an si tiah kan theih.
2021 January 19 zaan suimilaam 8:00 i Myanmar ram chung zawtnak ngei minung 448 an hmuhchap ca ah nihin tiang zawtnak ngei dihlak minung 135,243, zawtnak in a thi mi minung 2,986 le sii-inn in chuahter cang mi minung 118,657 an si tiah Ramkomh Ngandamnak Zung nih a thanh.
