Falam khuachung ah SAC ralkap he kahdohnak tuah lo ding in Falam mipi aiawh in Falam Pawlpi nih CNO/CNDF sin ah nawlnak a tuah a timh, tiah thawng kan theih.
Falam khua upa minung 65 cu Falam Pawlpi hruainak in September 7 ah khan Falam khua i Nunphung Innpi ah ton biaruahnak an ngei hna i, atu bantuk in khuakhaannak an ngeih hi a si, tiah Falam tualchung thangzamhnak Meifar Thuthang nih a ṭial.
Cu ton biaruahnak ah cun, “A si khawh ahcun Falam khawpi hi kah lo in um khawh a si ahcun ahohmanh nih kah loin um hna sehlaw ti kan duh tiin CNO/CNDF sin ah nawlnak tuah siseh,” tiah khuakhaannak an ngei.
Atu bantuk in Falam kah an duh lonak aruang cu: Kahdohnak a um tik ah mipi le mizapi ralkap lei in a nunnak a liammi an tam lai ti an phan pin ah Falam khua i sersiam khawh lo tiang in a rawk dih lai timi an phan ruang ah a si, tiah Meifar Thuthang nih a langhter.
Falam khuapi ah kahdohnak tuah lo in Kawlram chung le Laitlang chung hmun dangdang i thil sining ngiat hmasa rih ding le Falam ralzaam pawl khua an rak hlum ṭhan nakhnga tuaktaakpiak ding in ceihhmainak an ngei, tiah theih a si.
