Falam inn kang mi hna caah tiin ram chung ram leng in bawmhnak a chuak cang mi hi tangka sing 500 leng a si cang tiah theih a si.
Hi kong he pehtlai in inn kang bawmhnak committee chungtel Pu Zung bawi kung nih, “Inn kang bawmhnak caah kut an rak samh cio i atu January 25 tiang ahhin cun tangka sing 500 leng a chuak cang. Bawmhnak hmuh mi hi ram chung, Singapore, Malaysia le Aizawl ti pawl hin tangka sing 500 leng hi a si.America lei a um mi kan fa kan unau hna nih inn kang bawmhnak ding caah an rak kawl ve i annih hi cu an kan kua rih lo. Cun, inn kang bawmhnak tawlreltu committee nih Falam lansung ah thu in inn kang mi caah tiin bawmhhalnak zong kan tuah” tiah The Hakha Post ah a chim.
Falam inn kangah an sungh mi hi, Falam Mino Pawlkom nih buaktlak in a langhter ning ahcun tangka in sing 425,086,000 a si tiah facebook cahmai ah an langhter.
2021 January zarh thumnak tiang Chin Ramkulh chungah inn 12 a kang cang i, hi inn kangh ruangah minung pali nunnak a liam tiah theih a si.
