October 25 in aa thawkmi Falam khuachung kahdohnak ruang ah tualchungmi nu pakhat a nunnak a liam i, Falam khuami cheu-thum cheu-hnih hnih khua an chuahtak cang, tiah thawng kan theih.
October 25 in 28 tiang khuachung ah pehtlai in kahdohnak a um i, SAC ralkap nih an kahmi hriampi ruang ah tualchungmi a tlawm bik minung 3 hliamhma an pu cang.
Nizaan October 28 ah SAC ralkap nih an kahmi hriampi ruang ah kum 38 a simi sianginn cachimtu nu pakhat a nunnak a liam.
Atu bantuk in pehtlai in kahdohnak a um caah Falam khuami cheu-thum cheu-hnih nih Falam khua an chuahtak i kiangkap khua pawl ah ral an zaam hna, tiah tualchungmi nih an chim.
Falam khuachung i kahdohnak kong he pehtlai in CNO/CNDF lei nih atu tiang ah cun mizapi sin ah thawngthanhnak an tuahmi a um rih lo.
