Chin Ramkulh, Falam Sii-innpi ah kum 10 fai mizaw zohkhenhtu CDM nurse Daw Thae Thae Win cu SAC ralhraang nih an tlaih hnu 2023 February 25 ah an thah tiah theih a si.
Daw Thae Thae Win hi CDM a tuah hnu an khua Kathar Peng, Moedakyi khua ah khua a sa. An khua ah CDM a tuah hnu eidin dawr a hmete a tuah tiah theih a si.
SAC ralhrang nih an thah ning kong he pehtlai in amah he aa naihniam mi pakhat nih, “Kan hawinu hi Falam ah saupi rian a tuan mi a si. Min Aung Hlaing nih uknak a laak hnu CDM a tuah i an khua ah a kir. An khua a phak hnu ah eidin dawr hmete a tuah. Kanmah nih thawng kan hlat khawh ning ahcun SAC ralhraang pawl hi an khua lei ah ralhmai an nam. Ralhmai an nam lio ah Dalan nih an report i an tlaih. PDF pawl nangmah nih na zohkhenh hna na thlopbul hna tiin SAC nih an thah mi a si,” tiah a chim.
Daw Thae Thae Win hi pasal ngei lo a si i Falam Sii-innpi ah kum hra fai rian a tuan cang mi a si tiah kan theih.
