Nihin November 8 zinglei sml. 9:00 hrawng ah Falam khuachung ah kahdohnak a chuak i Pathangkhan sang lei ah inn pahnih an kaang, tiah thawng kan theih.
Tualchungmi pakhat nih, “Nihin zinglei h inn pahnih an kaang tiah khuachung ah a taangmi naihniam pakhat nih a kan chimh. Kannih zong Falam kiangkap ah kan um ko nain chum a zaam tuk caah fiang in kan hmu kho lo. Hriampi kah thawng cu kan theih ko. Atu inn kaang zong hi hriampi kahnak ruang ah maw a si, an khangh hramhrammi dah a si timi kan theih lo,” tiah Chin World ah a chim.
Falam khuachung ah minung tlawmte lawng an taang cang i ahohmanh leng chuah in mei an hmit ngam lo, tiah an chim.
Kan hnu October 25 in Falam khuachung ah i kahdohnak a rak chuak i SAC ralkap nih an kahmi hriampi ruang ah tualchungmi pali hliamhma an put pin ah kum 38 a simi cachimtu nu pakhat a nunnak a liam, tiah theih a si.
Falam khuachung ah kahdohnak a chuah bang in khuami dihlak dengmang ral an zaam caah khuachung ah a taangmi hna le ralzaam hna caah thlacampiak ding in Global Chin (Falam) Organization nih November 7 ah sawmna a chuah.
