2020-2021 tangka kum budget in Falam ah Government Technical Institute (GTI) sianginn sak timh a si i a hmun zong Zalai sang ah an sawhkhih cang, budget a tlak in sak hram an thok lai, tiah tuanvo ngeitu sin in July 15 ah kan theih.
“Hi sak nakding hmun hi voi hnih kan va zoh cang i Zalai Sang ah a um mi hmun pakhat kha kan sawhkhih. Cozah sianginn tling GTI a si lai. Hihi Chief Minister Salai Lian Luai aa zuamnak thawng in a si. Atu caankar (lawlawse) hi cu kanmah Hakha GTI nih kan tlaihchung ko lai. Budget hi October thla ah a tla te lai i tender hna an auh rih lai. Zeitik ah dah sak hram an thok khawh te lai ti belte cu a fiang kho rih lo,” tiah Hakha GTI Sianguk Dr. Salai Tluang Za Thang nih The Hakha Post ah a chim.
Falam GTI hi pe 162’x38’ kau, dot 2 in an sak lai. 2020-2021 tangka kum budget hngah a si ca ah zeitik ah dah sak hram an thok lai, ti belte a fiang rih lo, tiah kan theih.
