January 18, 2021, Chin Ramkulh Falam khuapi ah COVID-19 zawtnak ngei minung pahnih hmuh chap an si i Falam peng COVID-19 zawtnak ngei dihlak minung 10 an si cang tiah tuanvo ngei tu hna sin in kan theih.
Falam COVID-19 tuanvo ngei pakhat nih, “Atu zawtnak kan hmuh mi hna lak ah pakhat hi Yangon in a rak tlung mi a si. Lungpi erhkhumhnak hmun ah nisarih chung erhkhumh a si hnu in swab an chek tik ah zawtnak hmuh a rak si. Positive pakhat deuh hi cu Jannuary 12 ni ah zawtnak hmuh a rak si mi he naihniam in an um ruang ah zawtnak an ni chawnhbarh mi a si. January 12 ni i zawtnak hmuh a si mi he a naihniam mi minung 14 zong erhkhumh an si. Innchungkhar pali zong Home Quarantine chiah an si i, Siipin zung le Khuate thanchonak zung hna cu phihkhar chung an si,” tiah The Hakha Post ah a chim.
Falam COVID-19 Volunteer hruaitu Salai Timmy Htut nih, “2020 kum dih tiang Falam COVID-19 Volunteer hruainak in khua luhnak gate chek tuah le rawl chuan hna cozah he a fonh in rian kan tuan ti. 2021 in cun erhkhumh mi hna ca ah rawl chuan lei tuanvo hi Falam Mino Pawlkom phu nih a kan bawmh cang. Cawn nikhat, nihnih le nithum hi COVID-19 Volunteer group nih kan chuan i cawn nili, ninga le niruk hi Falam mino pawlkom nih an chuanpiak hna. Falam khuapi COVID-19 zawtnak i runvennak ca ah mahle riantuan khawh ning cio in kan i bawm dih ko” tiah The Hakha Post ah a chim.
“Falam khuachung ah COVID-19 runvennak ca ah khua luhnak gate ah chek-up kan tuah hna. Falam peng chung a um mi vialte Falam khua chung luh an duh tik ah khuabawi theihpinak ca an i ken cun luhter an si lai. Ramdang in a rak tlung mi vialte cu erhkhumh dih an si lai. Yangon le Mandalay in vanlawng in a ra tlung mi hna cu zawtnak ngei lo ca an ngeih ca ah ni sarih erhkhumh an si lai, motor in a ra tlung mi hna cu ni 14 erhkhumh an si lai. Tedim, Tonzaang, Mindat, Kalay le Tamu lei in rak tlung i Falam khuachung ah a um ding a si ahcun swab lak in chek an si lai i, erhkhumgnak hmun ah ni 14 erhkhumh an si lai. Hakha le Thantlang lei gate hi cu Hakha gate nih tha tein an chek dih ca ah kan chek ti hna lo” tiah a chimchap.
Falam Sii-inn ah zohkhenh cuahmah mi COVID-19 zawtnak ngei minung 10 an si. Lungpi erhkhumhnak hmun ah erhkhumh mi minungh 50 an si tiah kan theih. Kalay khualipi in Falam khuachung a tan ding mi motor mawngtu le a zuultu vialte cu Falam tool gate ah chek-up tuah an si lai i zawtnak an ngeih lo hnu lawng ah khua chung luhter an si lai tiah thawng kan theih.
