` Electric mei unit 150 free in an pek mi chung ah mei man pek hau ti lo ding Myanmar ram chung ah chungkhar 3.4 million an si i, hi chung ah Chin Ramkulh in chungkhar minung 25,968 an i tel tiah Chin Ramkulh Electric Zung in kan theih.
COVID-19 zawtnak ruang ah rammi hna chawlehthalnak lei siseh, lungthin thazaang lei ah siseh lam dangdang in a bawmh khawh nakhnga August 1 in December 31 tiang unit 150 tang poh free in an pek hi a si.
Chin Ramkulh chung in unit 150 tang man loin a hmang kho ding hna hi Hakha in chungkhar 8298, Thantlang in 1957, Surkhua in 97, Hnaring in 194, Falam in 3938, Tedim in 2718, Tonzang in 911, Cikha in 296, Rihkhawdar in 430, Khaikam in 738, Wiabula in 57, Mindat in 2347, Matupi in 1310, Kanpetlet in 813, Rezua in 459, Paletwa in 888, Sami in 288, Lailenpi in 197, Cinduai in 38, dihlak fonh 25968 an si tiah Chin Ramkulh Electric Zung in kan theih.
Unit 150 hi a man in tuak a si cun, Ks. 11,550 a si i, Myanmar ram chung COVID-19 zawtnak an hmuh ka April thla in an thawk mi a si.
Hi kong he pehtlai in Chin Ramkulh, Electric Zung Lutlai U Myo Sin nih, “Chin Ramkulh chung hi a liam cia thla chung tiang ahkhan 75 in kan lak. Tu thla in hin Unit 150 in lak a si cang lai. Unit 151 zong hi Unit 150 man a si mi Ks.11,550 an luatter an si lai,” tiah The Hakha Post ah a chim.
Myanmar ram chung ah Electric mei a hmang mi innchungkhar hi 2019 kum ah 4.8 million a si i, kum khat chung ah sing 4 leng a karh. Chungkhar khat nih buakthlak in mei hman mi hi Unit 370 tluk a si.
