Electric 150 Unit man Ks. 11,550 cu 2021 January 31 tiang a man laak lo a si than lai tiah Ramkomh Electric Minister Zung nih 2021 January 27 ah mizapi sin ah cathanh a chuah.
Cathanh an chuah mi chung ah, “Ramkomh Electric Minister Zung lei nih Myanmar ram chung COVID-19 kong he pehtlai in phihkhar caan January 31 tiang an sauh than ca ah atu bantuk in January 31 tiang Unit 150 man kan laak lo hi a si,” tiah aa tel.
January 31 tiang Unit 150 laak lo ding kong ah Chin Ramkulh Electric Zung Lutlai pakhat nih, “Ramkomh zung lei nih cun mizapi sin ah a man laak lo ding in le zaangfah than ding in an thanh cang. Official ngaingai cun kannih Chin ram ahcun a phan rih lo. Atu Online in an thanhnak lawng kha si rih. Chin Ramkulh chung zong aa tel ve ko lai ti kan zumh,” tiah The Hakha Post ah a chim.
Chin Ramkulh chung lawng ah Electric 150 unit man a pe lomi hi electric mei a hmang mi zatuak 100% chung ah zatuak 94% hi a pe lomi an si tiah Electric zung lei in thawng kan theih.
Cun, “Chin Ramkulh chung ahhin Electric mei a hmang mi dihlak 30,289 an si. Hi a hmang mi hna chungah Unit 150 man laak lo hnu minung 28,625 hi free in an hmang. A fawinak in chim ahcun mei an hman ning hi thla khat ah Unit 150 a luan lomi an si,” tiah a cunglei minung nih The Hakha Post ah a chimchap.
