US President thimnak ah Donald Trump nih teinak a hmumi cung ah NUG ramleng vuanci Daw Zin Mar Aung le NUG caankarlak President Duwa Lashi La zong nih conglawmhnak bia an chim, tiah theih a si.
Donald Trump hruainak in a biapimi le a fekmi pehtlaihnak he hmailei ah karhlan ṭi ding in ruahchannak kan ngei, tiah Duwa Lashi La nih X (Twitter) cahmai ah a ṭial.
Daw Zin Mar Aung zong nih, “Kan duh ah siseh, kan duh lo zong ah siseh, hihi Democracy i aa dawhnak cu a si ko. A dikfelmi thimnak result a si caah kan cohlan ko. Vice presient (Kamala Harris) zong kan in upat. Thimnak ah teitu a simi Donald Trump kan in lawmhpi,” tiah a ṭial ve.
US President thimnak ah Republican Party in Donald Trump nih Democratic Party in aa zuammi Kamala Harris cu Popular Vote le Electoral Vote, a pahnih in a tei.
Hmai kum January 20, 2025 ah Donald Trump cu US President Office ah rianṭuan hram a thawk te lai, tiah theih a si.
