Karenni (Kayah) ramkulh, Demoso Nichuahlei Dawtamahgyi khua kahdohnak ni li chung ah SAC lei ralbawi pawl tel in 90 leng an thi i 50 leng hma an pu tiah Karenni ralkap KNDF nih nihin ah an thanh.
Cu kahdohnak ah cun SAC lei tampi an thih lawng si lo in hriamnam zun 40 leng le kuanzen tampi zong an lak khawh.
Dawtamahgyi khuate ah umhmun a hung khuar mi SAC ralhraang pawl cu March ni 20 in 23 tiang KA, KNDF/B (10), KNDF/B (15) KNDF/B (16), KNDF/ETD, Naypyitaw PDF hna i bawm in an phomh hna. SAC lei ah ralbawi pawl tel in 90 leng an thi, 50 nak tlawm lo hma an pu, an hriamnam tampi Karenni ralkap phu komh nih an laak.
SAC ralhraang sin in MA-1 meithal zun 10, MA-2 meithal zun 10, MA-3 meithal zun 10, MA-4 zun khat, 9MM pistol zun 5, RPG zun 2, 60MM miakpi zun 2, bomb kawlnak seh pakhat, pehtlaihnak seh pawl, mine, kut cheh bomb, laptop computer pawl, phone pawl, kuanzen tampi le ralhriamnam he aa pehtlai mi thil tampi kan lak khawh tiah an thanh.
“SAC ralkap pawl an rak luh thawk in nihin tiang kahdohnak ah kanmah KNDF ralkap pahnih, KA ralkap pahnih, Naypyitaw PDF ralkap pakhat hna nih nunnak an pek. A nunnak a pe mi kan ralkap pawl ca ah KNDF nih a zungzal in upatnak kan pek hna lai,” tiah an langhter.
SAC ralhraang 330 hrawng cu March 9 thawk in Karenni ramkulh, Bawlakhe khua in Demoso peng Dawnye-hku khuate lei ah phu thum ah i then in an rak lut. Cu ralhraang phu thum in ralkap a cheu tluk cu ni li chung kahdohnak ah an thi, hma an pu. March 9 thawk in nihin tiang Dawtamahgyi, Dawsophiah le Dawnye-hku ah an i kap i SAC lei cu faak ngai in an nam khawh hna ca ah Bawlakhe le Hpruso hrambunh SAC ralkap nih miakpi in heh tiah kah an bawmh hna pin ah vanlawng le helicopter hmang in ni fatin nawn an rak kah hna.
Cu ruang ah hma a pu mi rammi ralkap zong an um i kiangkap khua pawl zong an khua ning in an zaam hna tiah theih a si. SAC ralhraang nih vanlawng in bomb an thlak ruang, miakpi kuan nih a tlak ruang le ralhraang hrimhrim nih an khangh ruang ah inn 100 leng a ciam.
SAC ralhraang battalion pathum cu Dawnye-hku, Dawsophiah le Dawtamahgyi khuate ah umhmun an khuar caah Karenni ralkap phu komh he fakpi in an i kah cuahmah lio a si.
Atu kahdohnak fakpi in pehzulh khawh nakding, hriamnam kuanzen pawl i chap than nakding ah ramchung, ramleng um rammi hna nih biatak tein kan bawm uh tiah KNDF nih thawng an thanh. (Ref: KNDF, People’s Spring)
Hmanthlak ca: Dawtamahgyi kahdohnak ah Karenni ralkap komh nih SAC ralhraang hriamnam an laak mi a si.
Photo: KNDF
