Hakha Dawrhlun sang mino nih anmah tein thlanhmun acre 15 cu 2020 December thla ah an i tuah tiah theih a si.
Hi kong he pehtlai in Dawrhlun sang mino Chairman Phun Lian Cung nih, “Kannih lei hi thlan- hmun kan ngei lo, cu ruang ca zongah kanmah tein kan i tuah mi a si. Hi kan tuah mi hi kan mah dawrhlun sang mino le dawrhlun sang zah-zah-ka i bawm in kan tuah mi a si. Dawrhlun zatlang thanchonak bu nih hin a tawlrel mi a si, mino nih hin tuanvo kan lak, thlan zong hi kan ser chuah mah lio a si. Hi kan tuah mi hi kanmah mino cu tangka kan ngeih lo caah kan sang chungah an minung zoh in tangka thong 10 in thong 50 karlak kan khawlh hna. Cun kan sang ah bochan deuh mi le mino upa pawl tu hi tangka sing 2 cio kan i khawl, cun Pyidawtha lei zong in bawmhnak an kan pe mi zong an um pah. cu tangka in cun kan tuah mi hi a si” tiah The Hakha Post ah a chim.
“Thlanhmun kan tuahnak hmun hi acre 15 a si, hmun hi tangka sing 35 in Mah Thein nu te ram kan cawk mi hna a si,Mah Thein nu te nih hin pumpak in cawk mi cu siseh law an siang hnga lo, asinain bu pi in kan hal hna tikah an kan siangh hi a si. Thlan zong hi kan lim cun hawi nakin man fawi deuh in zuar zong kan timh” tiah a chimchap.
Hi rian an tuan mi hi Dawrhlun zatlang thanchonak bu nih a bik in a tawlrel mi a si. Dawrhlun zatlang thanchonak bu hi 2013 kum in sang thanchonakding caah an rak dirh mi a si tiah theih a si.
Photo/ Lian Hakha
