2020 April 21 ah Myanmar ram, State Counselor Daw Aung San Suu Kyi nih Paletwa Peng chung AA le Cozah ralkap kar kahdohnak kong he pehtlai in cathanh a chuah mi kong ah Chin Ramkulh Minister Pu Soe Htet le Chin Ramkulh Sipin Minister hlun Salai Isaac Khen hna nih a tanglei bantuk in an chim.
Hi cathanh a chuah mi chung ah Paletwa khuami le Paletwa khuachung ah aa dor mi ralzaam hna ca ah ei din facang an luhpi khawh mi kong, Paletwa Peng kahdohnak a daih tik ah caan sau an thanchonak le an nun nakding ca ah riantuan aa timhnak kong a telh chih.
Cun, cathanh a chuah mi chung in dal 3nak ah COVID-19 zawtnak in i runven nakding ca ah Cozah, mizapi le Volunteer (dawtnak he a tuan mi) hna nih bawmh ding in an i timhlamh lio ah Rakhine ralkap (ULA/AA) mi ramh hmang hna nih Rakhine ram le Chinram chung ah thil tha lo an tuahnak kong, mizapi i an nunnak, an inn le lo khamh ding in Cozah ralkap nih an humhim, an runvennak cung ah ralkap sin ah lunglawmhnak a langhter mi kong pawl aa tel.
Cun, cathanh dal 4 le 5nak ah Rakhine ram le Chinram chung kahdohnak a chuah ruang ah a nunnak a liam mi, hliamhma a tuar mi hna an dihlak bawmhnak pek a timh mi kong aa tial chih. Hi cathanh a chuah mi kong he pehtlai in aa lawm mi an um bantuk in aa lawm lo mi zong an rak um ve ca ah hi kong ah ramkhel lei in Salai Isaac Khen le Cozah lei in Minister Pu Soe Htet hna nih an hmuh ning a tanglei bantuk in kan langhter.
Minister Pu Soe Htet nih, “ Hi cathanh a chuah mi hi kei cu Paletwa khua thi le sa ka si ca ah lunglawm tein ka cohlan, ka don. Rampi i aa bochan mi hna nih atu bantuk in cathanh an chuah mi hi thill sining dikthlir in an theih thlu ca ah a si. A hmun taktak ahcun kan ruah ning leng in harnak an tong. Hi kahdohnak hi a liam cia kum 2015 in aa thok cang mi a si. 2020 kum in kum nga a tlinnak a si cang. Kan harsatnak vialte Rampi cozah nih a kan theihpiak i kan bawmh hna lai a timi hi kan ca ah lunglawmh awk tlak taktak a si. Cathanh a chuah ruang ah atu nakin kahdohnak a fak chin lai ti a si lo. Atu nakin ralkap nih an runven khawh ahcun atu nakin remdaihnak a um deuh chinchin ko lai,” tiah The Hakha Post ah a chim.
Cun, Chin Ramkulh Minister hlun Salai Isaac Khen nih, “ Cathanh a chuah mi dal 1,2,4,5nak hna hi kanmah leikap nih cun lunglawm tein kan cohlan. Zeiruangah ti ahcun hihi kanmah lei nih kan herh bak mi a si. Paletwa hi atu ah har khawh chung an har. Facang hi a si khawh chung in kan luhpi ca ah thil harsa ngai a si. Harnak phunzakip lak ah facang kan luhpi khawh mi hi i lawmh awktlak taktak a si. Daw Aung San Suu Kyi amah pumpak in cathanh a kan chuahpiak mi hi kan i lawm. Asinain cathanh dal 3nak ah aa tel mi tu hi cu amah leikap hmuhnak le ruahnak sawh a si. Ralkap nih an kilven, an humhim le him lo cu mizapi lei nih an theih dih. Chim ko ahcun Chinram ah siseh, Rakhine ram ah siseh, Ralkap le AA kar ah a chuak mi kahdohnak hi AA lei in maw, Ralkap lei in maw pakhat khat aa palh sual mi cu a um hrimhrim. Hihi mizapi nih kan theih tuk cio mi a si. Atu cathanh a chuah mi hi chim ko ahcun kum 2020 chung ah raltha ngai in a aupi mi, a chim mi a si. Asinain atu cathanh a chuah mi chung in AA hi miramh hmang cazin ah a chiah mi dal 5nak ahkhin atu kan sining he aa pehtlai maw timi biahalnak a chuak. Cathanh a chuah tlawmpal ah WHO riantuan an kah hna nak, khuami an kah hna nak thawngpang tete a chuah ca ah mizapi zong nih namneh le nek a si. Hi cathanh a chuah mi ahhin a chiatnak in a thatnak lei tu in Chinmi nih i lak kho hna usih law tiah ka duh,” tiah The Hakha Post ah a chim.
