Sagaing ramṭhen, Dabayin khua laak kahdohnak ah thongtla le tualchungmi 130 leng cu PDF nih an khamh khawh hna, tiah theih a si.
PDF ralkap bu ruk fonh nih August 18 ah Dabayin khua cu an rak laak khawh i, thongtla minung 20, Non-CDM 40 le tualchungmi 72 cu an khamh khawh hna, tiah NUG runvennak zung nih nizaan August 20 ah theihternak a tuah.
Dabayin khuachung i SAC ralkap le pyosawhṭhi pawl hmun an khuarnak palek zung, penguk zung, sianginn, Buddhist pura le a dang hmun thum cu PDF nih an laak khawh.
Kahdohnak ah SAC lei in minung 18 an thi i, meithal zun 22 leng a dangdang zenkuan tampi PDF nih an laak khawh.
PDF nih Dabayin khua an laak hnu ah SAC nih vanlawng in faak ngaiin kahdohnak a tuah lawng si loin ralkap thazaang tampi chap in PDF pawl an rat hnawh ṭhan hna caah PDF nih Dabayin khua cu an chuahtak ṭhan, tiah theih a si.
