CDF-Matupi le CDF-Kanpetlet in a chuak mi Daai battalion pahnih cu CDF-Daai ah tlamtling te in an i fon cang, tiah theih a si.
CDF-Matupi in a chuakmi Licang Battalion le CDF-Kanpetlet in a chuakmi Kkei Sing Battalion nih CDF-Daai ah kan i fon cang, tiah nizaan July 17 zaan ah khan thawngthanhnak an tuah.
Aluancia May 16-17 ah khan Paletwa, Matupi, Kanpetlet le Mindat ah a um mi Daai miphun hna tonpumhnak an rak tuah i, Daai Regional Council (DRC) timi an rak dirh.
Daai hmunram ah a um mi mizapi cu DRC ukhruainak pakhat tang ah um ding in le peng pali chung ah a ummi Daai hriamtlai vialte cu DRC nih a ser mi CDF-Daai ah i funtom ding in khuakhaannak an rak ngei.
Cucaah, DRC tawlrelnak le tlangtlaknak in a kal mi CDF-Daai ah i funtom ding in Kkei Sing Battalion le Licang Battalion cu CDF-Matupi le CDF-Kanpetlet in a chuakhnak hi a si.
Daai hriamtlai hna funtomnak rian an tlamtlinh hnu ah DRC hi Chinland Council lei ah maw a um lai, Chin Brotherhood lei ah dah a um te lai ti mi fiang in theih a si rih lo.
