Nihin Myanmar ram dirhmun ah a linsa ngai mi AA le Cozah Ralkap kahdohnak ruang ah Chin Ramkulh, Paletwa Peng, khuami cheukhat hartong in an um i lo an thlo kho lo, lei zong an thuang kho lo, tiah kan theih.
“Paletwa cu lo zong tuah awk a tha lo, lei zong tuah awk a tha lo, umkalnak zong a tlamtlin lo tik ah ramchung in asiah ramleng in asiah bawmhnak an hmuh ahcun caan sau ca ah harsatnak a tlawm deuh lai. Bawmhnak an hmuh lo ahcun caan sau um ding ah harsatnak a um lai. Chin Ramkulh Cozah nih ram leng ah bawmh halpiaknak cu a um lo nain vawlei cung kokek harnak a tong mi a bawmchantu phu nih kan sin ah zeitindah kan bawmh hna lai, zeidah bawmh an herh tibantuk in an kan hal i kan tawlrelpi mi hna cu a um. Paletwa lawng si loin Rakhine tibantuk zong ah hibantuk in bawmhchantu hi an um cio. Cu bantuk in bawmh a duh mi hna ca ah Pyidaungsu Cozah nih kan kham lo, an ti,” tiah Chin Ramkulh Cozah Chimphuanak Nawlngeitu Minister U Soe Htet nih The Hakha Post ah a chim.
Chin Ramkulh Cozah nih Paletwa hartong ca ah 2018 December ah facang tun 200, hnipuan fenhaih le khengbel tibantuk zong ke pahra ngei motor pakhat phur tluk bawmhnak an rak pek bal. Cun, 2019 January ah facang tun 200 le March ah facang tun 200 leng a bawmh than hna. Cun, Myanmar ram Kokek Hartong Bawmhnak Zung nih 2015, 2016, 2017, 2018 kum lio tein facang, chiti, cite tibantuk in bawmhnak a pek ve i nihin tiang bawmhnak a pek mi dihlak hi tangka in Kyats sing 570 tluk man a si cang, tiah kan theih.
“Paletwa Peng ngakchia an ngandamnak le an fimcawnnak ca zong ah lungrethei ngai a si. Cheu khat khua sianginn cu an rawk ca ah sianginn an kai kho ti lo. Asinain, a si khawh chung in ca an cawn khawh nakding kha kan tuahpiak hna i kan zuam cuahmah ko,” tiah Minister U Soe Htet nih a chimchap.
Myanmar ram Cozah Ralkap le Arakan Army (AA) kahdohnak ruang ah Rakhine Ramkulh ah hartong thong sawmli leng an um cang i Paletwa ah hartong thong hnih leng an um, tiah kan theih.
NLD Cozah nih Myanmar ram remdaihnak ca ah Kumzabu 21 Panglong Tonpumhnak, ti min bunh in remdaihnak rian a tuan. Asinain, nihin tiang Tlangcung Hriamtlai Phu nih kahdaihnak min an thu dih rih lo i Myanmar ram chung hmun kip ah Cozah Ralkap le Hriamtlai Phu kar kahdohnak a um peng. ###
Theihternak le ralrinpeknak: The Hakha Post hnatlaknak tel lo in kan thlah mi thawngpang i tlen le hmanpiak kan siang lo. Ningcang lo in a hmang mi online thawngzamhtu cu screenshot he phozar nan si lai.
