Cozah nih Thantlang ah Bogyoke Aung San lem bunh timh mi khuami an lung a tling lo

Thantlang Peng Uknak Zung Lutlai nih chuahpinak in Thantlang khua laifang ah Bogyoke Aung San lem bunh ding in Sipin nih Ks. sing 300 dih in budget an halchih mi cu Khuami an lung a tling lo.

Hi kong he pehtlai in Thantlang Sipin Committee chungtel Pu Biak Tha Cung nih, “Hi kong meeting an tuah lio ah kei hi ka um lo. Fiang in ka hngal lo nain Thantlang Peng Uknak Zung Lutlai U Suan Thet nih biatung a dirh mi a si i meeting tuah mi hnatlaknak in Sipin nih Ks. sing 300 budget a hal hi a si,” tiah The Hakha Post ah a chim.
Hi milem bunh duhlonak cu Aung San doh si lo in an lungput kan duh lo ca ah a si tiah Chin National Democratic Party General Secretary Salai Ceu Bik Thawng nih a chim.
“Hi milem bunh kan duhlo mi hi amah Bogyoke Aung San kan dohnak a si hrim lo. Kan ram ah bunh an timh mi an lungput hi kan duh lo mi tu a si. Tuanbia ngei Lai pasal tha tampi kan ngei ko hna. Hi bantuk pawl tu hi an kan tuahpiak ding a si deuh. Atu Cozah lei nih an timh mi hi an ngol chung ah a tha. Hi an tuanchuah ding ahcun buainak faakpi a um kho mi a si,” tiah Salai Ceu Bik Thawng nih a chim.
Hi kong he pehtlai in Chin University Students pawl zong nih hi tuah ding mi an duhlonak Cozah lei tuanvo ngeitu sin ah theihternak tuah ding le cathanh chuah ding in timhtuahnak an ngei.
Thantlang Sianghleirun chungkhar President Salai Za Cung Hnin nih, “Hi an timh mi hi cu Tlangcungmi an kan zawmhtaih bia a si. Laimi nih kan i ngeihchun minthang zong anmah hmunhma ah bunh ding sisehlaw an duh ve lai lo. Cu bantuk thiam in kanmah zong nih kan duh ve lo. Hi an tuah ding a si ahcun sianghleirun lei siseh, minolei zong nih faakpi in kan cawlcang lai,” tiah The Hakha Post ah a chim.
Hi kong he pehtlai in Thantlang Sipin Committee lei zong nih fianternak zong tuah an timh i budget hnatlakpinak cu a um rih lo.