Chin National League for Democracy (CNLD) party nih Chin Ramkulh Cozah kan tlaih ahcun thla 3 chung ah Chinram kan thlen lai, tiin ka chim mi he pehtlai in ka chim duhnak char loin ningcang loin thawngpang a leng, tiah CNLD party Chairman Pu Ngai Sak nih July 9 ah a chim.
“Ka chim duh bik mi hi Cozah kan tlaih ahcun kanmah ramte ah kan miphun sinak le muisam a keng bik mi kan caholh dirpi hi a si. Cucu, Zung kip signboard min, lam min tibantuk khi Kawl ca lawngte a si. Khuate in a ra mi si hna seh, khuapi zong ah cacawnglo nih zeibantuk Zung a si hmanh kan hngal lo. Cucaah, kanmah le kan Pengtlang holh cio in kan tial hnu ah Kawl ca a tang ah kan tialchih lai. Kanmah ram ah kanmah miphun caholh muithlaam leng ve seh! Cathiam he thiamlo he thil kan theih khawh nakding khi biapi ah ka ruah mi a si. Cun, lam min zong hlanlio kan pale minthang min bak in thlen dih cio khawh i zuam ding, tibantuk kha interview pakhat ah ka chimchih i cucu ka duhnak char loin zeizong vialte kha thla 3 chung ah kan thlen dih lai tiin an ruah. Social Media nih ka chim duhnak char loin ka chim lo ning in bia an ka chimter ka ti mi a si,” tiah Pu Ngai Sak nih The Hakha Post ah a fianter.
Hi lawng si lo, thla thum chung ah Chinram tlang kip ah vailam tung kan phun dih lai, ti mi zong kha thla thum theng ah tinak zong a si lo pin ah Biaknak kong hi rianrang in tuah khawh mi a si lo. U Nu chan in Ne Win chan in biaknak zalonnak an rak hrawh tuk cang mi kong zong ah pingpalo lawng tein social media ah thawngpang a leng, ti zong a cunglei upa nih a chim fawn.
