Coronavirus Disease 2019 (COVID-19) zawtnak a um hnu in Hakha market ah sasen sa le vok sa cu a hlan tluk in an manh kho ti lo tiah kan theih.
Hi kong he pehtlai in voksa zuartu Pu Run Ceu nih, “COVID-19 zawtnak a um hlan ah cun ni khat ah vok hi pakhat silole pahnih hi cu kan manh khawh tawn ko, hi zawtnak a um hlan ah cun buuti dawr khat hmanh nih hin ni khat ah cuai 5 hi cu an kan lak, zawtnak um hnu cun dawr pawl hi hon a si ti lo tik ah a hlan i cuai 5 an lak tawn mi kha cuai tan ti pawl lawng in an lak cang. Cu lawng si lo in thlacamnak a tuah mi le a leng lei in sa a that mi an tampah ca zong ah a si fawn. Atu cu ni khat ah vok khat hmanh hi a zuar a har ngaingai cang” tiah The Hakha Post ah a chim.
Cun, COVID-`19 zawtnak a chuah hlan ahcun sia a ngan mi pakhat an thah ahhin an manh dih tawn nain atu ahcun an manh kho tuk ti lo tiah kan theih.
Pu Tial Hei nih cun “Hi COVID zawtnak a um hlan ah cun pakhat kan thah ah hin kan manh dih peng ko, atu cu a ngan deuh mi kan thah ahcun ni khat ah kan manh kho dih ti lo, ni hnih hna zuar a hau, ni hnih kan zuar ah hin cun sa zong hi a mui a chia, a sa zong a zor fawn. Atu ahcun zarh khat ah sa pum hi 4 lawng kan thah khawh cang. Satil pawl hi kawl lei deuh ah lak mi an si caah sa thah awk zong hi a har ngai ko. Atu kan sining hin cun a hram (a zin) chuah ding hmanh hi kan i harh ko, zei caah ti ahcun hi zawtnak um hnu hin cun kan manh bak lo, rawl dawr, buuti dawr ti bantuk pawl zong hi parcel lawng in a si tik ah a hlan tluk in an kan la ti lo. Cun, cozah lei zong nih hin hi zawtnak ruangah hin ngunkhuai zong hi tlawm deuh in lak a um fawn lo caah a man hram (a zin) hi kan chuah kho hnga maw kan ti nak hi a si” tiah The Hakha Post a chim.
COVID-19 zawtnak ruangah hin sa thahnak market lawng si lo in a dang chawdawr, ei din dawr le lakphak dawr pawl zong hi a hnursuan ngai hna, cheu nga ah cheu khat an zuar ning zong a tum tiah theih a si.
