Taluk ram Wuhan khuapi ah Coronavirus Disease 2019 (COVID-19) zawtnak an hmuh ni in kum khat chung ah zawtnak in a thi minung 2 Millions leeng an um cang.
Zawtnak ruang a thi mi minung 2 Millions chung ah minung 1 Million hi thla riat cung ah a thi mi an si. Thla riat hnu, thla li chung ah minung 1 Million an thichap tiah theih a si.
Hi zawtnak zeitindah kan i khamh khawh lai i kan i runven khawh lai timi rian a tuan tu sii lei thiamsang Antonio Guterres nih, “Hi zawtnak i runven khawhnak le i khamh khaw nakhnga ca ah tiin rian kan tuan ko nain, ka si khawh tawk in kan thiamnak kan chuah ko nain, vawleipi huap in kan thazaang hman mi a tlawm deuh ca ah kan tlamtlinh khawh rih lo. Atu hi American, Britin, Isarel, Canada, Germany ram pawl ahcun khamhnak sii an i chun cang Asinain, a taang mi vawleipi i thenli thenkhat hi cu zawtnak a zualhma kho mi a si,” tiah AP News ah a chim.
Vawlei cung huap zawtnak ruang a thi mi minung 2 Million leeng chung ah Myanmar ram in a thi mi 2021 January 15 zaan suimilaam 8:00 tiang an thanh ning ah minung 2,926 an si i, hi chung ah Chin Ramkulh chung in minung Tedim ah pakhat, Tedim Peng Tuithang khua ah pakhat le Matupi ah pakhat dihlak fonh nunnak liam ve.
Nihin tiang Myanmar ram chung ah zawtnak ngei dihlak minung 133,378, damnak a hmu i sii-inn in chuahter mi minung 116,610 an si cang tiah Ramkomh Ngandamnak le Zaanglek Zung nih a thanh.
Photo/ Internet
