Myanmar ramchung COVID-19 zawtnak a ngei mi Case No.150, kong ah Chin Ramkulh Cozah nih a langhter mi a diklo mi le Media cheukhat nih a thawngpang an tial ning kong ah a tanglei bantuk in mizapi sin le Cozah sin ah nawlnak le fianternak a tuah.
Tuluk ram in Myanmar ram lei a rak tlunnak kong
Tuluk ram in ka rak i thawh hi 2020 March 19 ah a si i, March 20 ah Shan ram Muse ka phan. Muse Hotel ah zaan hnih kan riak. 2020 March 23 zaanlei suimilaam 2:00 ah Muse in Mandalay lei ah kan i thawh i zinglei suimilaam 1:00 ah Mandalay kan phan. Hotel ah kan i din. March 24 zaanlei ah Mandalay in Kalay lei kan i thawh i, March 25 zingleisang ah kan phan. Tuluk ram in kan rak i thawh ah hin Kachin mi zong an i tel. Kalay kan phak lecangka khualei ka nulepa ka chawnh hna i ka nulepa nih Tiphul ah sii lei riantuan sayama an ka chimhpiak. Sayama nih khualei rak tlun colh ding a duh lo ca ah keimah he a rak tlungti mi ka hawinu te inn ah ka um.
Kalay ah Quarantine in an chiah le chiah lo kong
Kalay kan phak lecangka in khualei ka nulepa ka chawnh hna i ka nulepa nih Tiphul ah siilei riantuan sayama an ka chimhpiak. Sayama nih khualei rak tluncolh ding a duh lo ca ah keimah he a rak tlungti mi ka hawinu te inn ah ka tlung. Kalay kan phak ah Ngandamnak Zung lei riantuantu sayamate nih an rak kan zoh ko. Quarantine um ding le um lo ding kong ah min an rak kan lak. Kei tu cu ka min kaa pe lo i ka hawinu tu cu min aa pe. Ka hawinu hi Facility Quarantine ah si loin Home Quarantine in a um. Keimah zong cu Quarantine ah ka min kaa pe lo nain ka um ve thiam ko. Kalay kan um chung ah taksa linh sat lei zong an kan tah lo. An rak rat hmanh ah khin pe 6 dan in an um i, a langtlang in bia an kan ruah.
Kalay in Hakha lei a rak i thawhnak kong
Kalay i ka hawinu te inn ka um ni 13 hrawng a rauh hnu ah Kalay in Hakha kar a kal mi motor an phih lai, April 6 tiang lawng a ngah cang ti thawng ka theih. Hi thawng ka theih ca ah khualei tlun le ka duh tuk ve cang i ka nulepa phone in ka chawnh hna. Ka nulepa nih Ngandamnak zung lei nih Kalay ah Quarantine an chiah mi ah tha tein a um ko a si cun rak tlung ko seh tiah a rak leh hna. Ka hawinu i a nulepa nih April 6 a chuak ding Taungzalatt motor ah Ticket an ka cawkpiak i zaanlei suimilaam 4:00 ah kan rak i thawh. April 7 zinglei suimilaam 1:00 tluk ah Hakha kan phan. Ka rak i cit mi motor hi Thantlang motor a si ca ah Thantlang lampial in an rak ka don. Hakha ka phak hnu ah Dillo sang i a um mi ka Pu Ca That te inn tang ka taa sin ah ka um. Chun ah ka hawile he Thantlang lam Strawberry dum ah kan va leng. Kan rak kir hnu suimilaam 5:00PM hrawng ah Hakha um ka taa nih khualei ahcun a ka thlah i suimilaam 6:00PM ah khua kan phan. Khua ka phak hnu zong ah hin thawngpang a that lo ca ah khoika hmanh ah kaa chok lo, ka lengvak lo.
Hakha Quarantine an chiahnak kong
Khua ah ni zeimawzat ka caam in Hakha lei ah ka kai than. Hakha ka tlunnak ka Pu Mang nih bia chokvai a theih. Thawngpang a theih lecangka in ka pu nih cun siibawi sin ah i piah ding in a ka ti i keimah zong nih ka al ve lo. Hakha ka phak hnu siibawi sin kaa zohter hnu in siibawite nih Quarantine ah an ka chiahcolh hi a si. Tiphul ah Palek le siibawi hna nih an va tlaih mi a si ti hi a hman lo mi a si. An ka erh ah hin a zawt zong ka zaw lo, ka taksa nuamhlonak tete zong a um hrim lo.
Zaangfah nawlnak
Zaangfahnak tein zeibantuk minung zong nih ka zawtnak le ka sining kong hi rak ka hal hram ti hlah u. Media zong ah nan theih lo buin ka konglam hi rak ka tialpiak hram hlah u. Atu ka zawt mi nakin Media le mi dangdang nih a dik lo ning in nan ka ti mi hi ka tih deuh. Keimah zong ka dam tuk ko, ka thawng tuk ko. Zaangfahnak tein thil sining nan theih lo buin ka konglam rak tial hrimhrim hlah u, tiah hika The Hakha Post nifatin chuak thawngzamhnak ca in kan nawl hna.
Biakilh: Hi thawngpang le a awka hi amah he phone i chawnhnak in theih mi si. Chungkhar le khuami hna lungtlinpi nak in kan rak langhter.
