Hakha sii-inn ah an chiah mi Myanmar ram chung COVID-19 zawtnak hrik ngei Case No.150 nungak i a umnak Tiphul khua le a cambualnak hmun pawl Lockdawn chiah ding le chiah lo ding aa fiang rih lo tiah Chin Ramkulh Cozah chimphuannak nawl ngei Minister Pu Soe Htet sin in kan theih.
Minister Pu Soe Htet nih, “Hakha ah a pakhatnak COVID-19 zawtnak hrik ngei Hakha Peng Tiphul khuami Mai…… hi March 20 ni ah Tuluk in aa thawh i March 21 Shan ram Muse a phan i M2 khualbuk ah a riak. Cun, March 21 Mandalay a phan i, March 25 ah Kalay a phan. Kalay a phaknak Mah Hnin Si te inn ah aa thum. April 6 ah Hakha a phan i, Kalay in aa cit mi Motor he Tiphul khua ah a kal than,” tiah The Hakha Post ah a chim.
Cun, Tiphul khua Lockdown an tuah ding le tuah lo ding kong ah, “Lockdown tuah ding le tuah lo ding kong ah 2020 April 29 ah Cabinet Meeting kan thu i, hi meeting ahcun Lockdown tuah ding in bia kan chah mi a um rih lo. Amah he aa tawngtham mi Kalay lei le Mandalay lei tiang kan kawl lio a si. Amah he aa tawngtham mi le a tlongleng ti mi hna an sining zoh in bia kan chah te lai. Ruah lo pi zong in Lockdown tuah khawh a si, thil sining kan zoh hmasa ta rih lai,” tiah a chimchap.
