Chin Ramkulh, Tedim sii-inn ah COVID-19 zawtnak hrik an hmuh mi cu damlei a panh, tiah Chin Ramkulh Ngandamnak Zung tuanvo ngeitu sin in March 24 ah kan theih.
“ Hi mizaw hi a dam tuk ko. A tak linh lonak hi ni 3 hrawng a si cang. Cun, thaw chuah i harh tibantuk zawtnak hmelchunhnak zong a hramthok tein hmuh a rak si lo. A tak tlawmpal a rak linh mi lawng a si i, atu cu a tak zong a lin ti lo. Cun, hi a zaw mi hi, Tedim Sii-inn riantuantu inn sak thar mi ah kan chiah. Hi inn hi zun-inn le ti khawlhnak tibantuk zong a um i, eidin pekchanh zong ah anmah chung minung pakhat nih tuanvo a lak i a lang in an chanh,” tiah Chin Ramkulh Ngandamnak Zung lutlai Dr. Aung Ngui San nih The Hakha Post ah a chim.
Ngandamnak le Zaanglek Phu, Myanmar nih 2020 March 23 ah COVID-19 zawtnak hrik minung 2 cung ah hmuh an si, tiah a thanh. Asinain, atu tiang ahcun dam lei an panh i, an rak kalnak le an thutdirnak pawl zong kalum an khap tiah Ngandamnak lei tuanvo ngeitu sin in kan theih.
“Hi zawtnak hrik hmuh a si mi pa i, a rak tlung lei a tlunnak khualbuuk, a kalumnak i motor aa cit mi, cun a kalnak khuate le amah he aa tawnhtham mi tibantuk zong atu hi Trace kan tuah lio a si. Trace kan tuahnak ah hin Ngandamnak Zung, Ukhruainak Zung le a dangdang phu hna nih an kan bawmh i Trace kan tuah cuahmah i, cu chung i kan hmuh mi in WHO Guideline bantuk in MOHS i Guidentine ning in Quarantine tuah kan tim,” tiah a chimchap.
“Hi zawtnak he pehtlai in mizapi nih thinphan tuk le lau tuk ding si lo. Asinain ralrin lo tuk le duhpoh in thutdir ding a si lo. Cucaah, Ngandamnak Zung nih tuah ding a ti mi le tuah lo ding a ti mi tu kha tlamtling tein zulh khawh i zuam hna usih,” tiah Dr. Aung Nyew San nih a chim.
2020 March 24 tiang ah COVID-19 zawtnak hi ram 195 ah hmuh a si cang i, minung 380,000 leng zawtnak hrik an ngei cang. Cun, zawtnak in minung 16,000 leng an thi cang i, minung 102,000 leng zong an dam than, tiah kan theih.
