COVID-19 zawtnak hrik a ngei tiah Ramkomh ngandamnak zung nih a thanh mi USA khuasa, Tedim peng, Kaptel khuami Pa……. he Yangon in Kalay tiang MNA Vanlawng aa cit mi minung 52 hna cu COVID-19 zawtnak hrik an ngeih le ngeih lo check nak an tuah lai tiah kan theih.
Atu zawtnak hrik a ngei mi hi 2020 March 15 zarhpi ni suimilaam 12:15 pm ah Yangon in Kalay a kal mi Myanmar National Airline in a rak tlung i, hi vanlawng cung ah minung 52 an i tel tiah kan theih.
Hi kong he pehtlain in Chin Ramkulh Ngandamnak zung lutlai Dr. Aung Ngwe San nih, “COVID-19 zawtnak hrik a ngei tiah ramkomh ngandamnak zung nih a thanh mi Tedim peng, Kaptel khua pa hi ihkhun cung ah tho kho loin a zawfak mi a si lo. A taksa zong hi cu ti piin a lin lo, 37 Degree Celsius lawng a si . Hi ti zoh ahcun a dam mi kanmah bantuk in a cawlcang kho ko. Asinain zawtnak hrik a ngei tiah theih a si ca ah a leng ah chuahter loin inn chung ah kan chiah. Cun, kan i ralrin khawh nakhnga tiin amah he hmun khat ah vanlawng aa cit mi si hna seh, Kalay i a tlunnak inn i minung si hna seh, amah he aa pehtlai mi poh kan si khawh chung check nak kan tuah hna lai.Amah he aa pehtlai mi poh min cazin zong kan lak khawh cang. Atu mizaw a umnak Tedim peng Kaptel khua hi a inn in inn 700 an si i minung 3600 an um,” tiah The Hakha Post ah a chim.
Atu zawtnak hrik a ngei mi Pa…… hi March 19 suimilaam 4:00 am tluk in dam lo aa thok i suimilaam 8:00 am ah an khua chung PSI siibawi sin ah a vaa piah. A dam lo ning hi a hman lo ca ah siibawi pa nih an khuabawi pa sin ah thawng a thanh i an khuabawipa nih penguk zung lei ah thawng a thanh colh ve. Thawng an theih le cangka in Pa…. cu Tedim sii-inn pi ah an kuat colh. Zawtnak hrik a ngei tiah thawng an theih dih hnu in Palek nih Kaptel khua i an inn ah an cong.
