COVID-19 zawtnak a ngei mi hna hi Kalaymyo le Falam lei nih an duhlo, Hakha zong nih an duh lai lo nain, Myanmar ram Ngandamnak Zung nih cuka sii-inn ah chia u, an kan ti ahcun chiah a hau ko lai, tiah Chin Ramkulh Cozah Social Affairs (Fimcawnnak, Ngandamnak le Zaanglek) Minister Pu Pau Lun Min Thang nih April 16 ah a chim.
“Kalaymyo le Falam hrawng zong nih an cohlang lo ti a si. Hakha zong nih an cohlang ve hnga lo. Cun, kanmah Ramkulh Cozah zong nih kan duh lo kho ko nain mizaw zawnruah a hau ve tawn. Tahchunhnak ah atu Tedim sii-inn hi thli dawp ding (oxygen) zong an chambau ngaingai. Mizaw a zual tuk ko mi kha zohkhenh lo le thlopbul loin um phung a si lo. Zeidang an harnak le an herh mi bawmh zong hi kan rian cio a si. Amah belte, Myanmar ram Ngandamnak Zung nih cuka sii-iin ah chia u, a kan ti rih lo,” tiah Minister Pu Pau Lun Min Thang nih The Hakha Post ah a chim.
Hi kong ah Kalaymyo lei thial duh zong ah University hna nih duhlonak cathanh an chuah, khuami cheukhat zong nih an duh lo. Cun, Falam siiinn chiah ding zong Hluttaw Palai pakhat nih a duh lo ti a si. Cu kong ah Myanmar ram Ngandamnak Zung nih cutin khatin an kan ti sual ahcun al awk a tha te lai lo, tiah a cunglei Minister nih a fianter hi a si
